Rusia ka bërë një hap të rëndësishëm diplomatik duke njohur zyrtarisht Emiratin Islamik të Afganistanit, të drejtuar nga talebanët. Vendimi i Moskës u komunikua të enjten gjatë një takimi në Kabul ndërmjet Ministrit të Jashtëm afgan, Amir Khan Muttaqi, dhe ambasadorit rus, Dmitry Zhirnov.
Sipas Muttaqit, njohja zyrtare nga Rusia shënon “fillimin e një faze të re të marrëdhënieve pozitive, të bazuara në respekt të ndërsjellë dhe bashkëpunim konstruktiv”. Ai vlerësoi vendimin si një “shembull për vendet e tjera” që ende hezitojnë të vendosin raporte zyrtare me qeverinë aktuale në Kabul.
Që nga rikthimi në pushtet në gusht të vitit 2021, regjimi taleban ka kërkuar me ngulm njohje ndërkombëtare dhe investime, përkundër kritikave të vazhdueshme për shkelje të të drejtave të njeriut, sidomos ndaj grave dhe pakicave.
Në një deklaratë zyrtare, Ministria e Jashtme e Rusisë theksoi se ky hap do të nxisë zhvillimin e bashkëpunimit produktiv mes dy vendeve. “Besojmë se njohja zyrtare e qeverisë së Emiratit Islamik do të forcojë marrëdhëniet tona në fusha kyçe si energjia, transporti, bujqësia dhe infrastruktura,” thuhet në deklaratë.
Rusia gjithashtu u zotua për mbështetje në përpjekjet e Afganistanit për të luftuar terrorizmin dhe trafikimin e drogës, dy sfida madhore me ndikim rajonal dhe global.
Ky vendim i Moskës pritet të pasohet me zhvillime të mëtejshme diplomatike dhe ekonomike, teksa komuniteti ndërkombëtar vijon të debatojë mbi legjitimitetin dhe përfshirjen e regjimit taleban në arenën globale.
