Sekretari i Përgjithshëm i NATO-s, Mark Rutte, ka hedhur poshtë idetë për krijimin e forcave të pavarura evropiane të sigurisë apo misione ushtarake nën komandën e Bashkimit Evropian në Ukrainë, duke theksuar se partneriteti transatlantik mbetet thelbësor për sigurinë kolektive të Evropës.
Në një intervistë për agjencinë gjermane të lajmeve dpa, të botuar të enjten, Rutte u shpreh se Evropa nuk ka nevojë të shkëputet nga Shtetet e Bashkuara në çështjet e mbrojtjes, pavarësisht thirrjeve të disa politikanëve evropianë për struktura të pavarura të sigurisë.
Deklarata e tij vjen pas propozimit të Manfred Weber, kreut të Partisë Popullore Evropiane (EPP), i cili kërkoi vendosjen e trupave evropiane nën komandën e BE-së për të garantuar paqen në Ukrainë.
“Do të doja të shihja ushtarë me flamurin evropian në uniformat e tyre, përkrah miqve tanë ukrainas, duke garantuar paqen”, kishte deklaruar Weber për median gjermane Funke.
NATO mbi gjithçka
Rutte u distancua qartë nga ky vizion, duke nënvizuar se SHBA-ja është plotësisht e angazhuar në NATO dhe se forcimi i mbrojtjes evropiane duhet të ndodhë në bashkëpunim me Uashingtonin, jo paralelisht apo në kundërshtim me të.
“Jam absolutisht i bindur se SHBA-ja është plotësisht e investuar në NATO. Evropa po shpenzon më shumë dhe po merr më shumë përgjegjësi, por kjo duhet bërë së bashku me amerikanët”, tha ai.
Shefi i NATO-s rikujtoi se NATO nuk është vetëm Bashkimi Evropian, duke theksuar se 23 shtete të BE-së që janë pjesë e aleancës përbëjnë vetëm rreth një të katërtën e prodhimit të përgjithshëm ekonomik të NATO-s.
Arktiku dhe kërcënimi rus
Rutte vuri theks të veçantë edhe te Arktiku dhe Atlantiku i Veriut, duke i cilësuar si zona strategjike ku interesat amerikane dhe evropiane janë të pandashme.
“Një Arktik i sigurt është jetik për SHBA-në. Ne shohim aktivitet të shtuar të anijeve ruse dhe kineze atje. Këtë rajon mund ta mbrojmë vetëm së bashku – evropianë dhe amerikanë”, u shpreh ai.
Sekretari i Përgjithshëm paralajmëroi gjithashtu se Rusia mund të përbëjë një kërcënim serioz për NATO-n që në vitin 2027, sipas vlerësimeve të inteligjencës.
“Nëse ka një sulm ndaj NATO-s, atëherë të gjithë jemi nën sulm. Ky është Neni 5 – një për të gjithë dhe të gjithë për një”, tha Rutte.
Mbështetje për Ukrainën dhe rritje të shpenzimeve
Sipas tij, dy elementë janë vendimtarë për parandalimin e agresionit rus: mbështetja e vazhdueshme për Ukrainën dhe rritja e shpenzimeve për mbrojtje nga vendet anëtare të NATO-s.
Rutte vlerësoi veçanërisht angazhimin e Gjermanisë për të rritur shpenzimet e mbrojtjes në 3.5% të PBB-së deri në vitin 2029, shumë më herët sesa afati i vitit 2035 i rënë dakord në samitin e NATO-s në Hagë.
“Nëse i bëjmë këto dy gjëra, jemi mjaftueshëm të fortë dhe Putini nuk do ta provojë kurrë”, përfundoi ai.
