Sindikata e Bashkuar e Arsimit, Shkencës dhe Kulturës (SBASHK) ka shprehur mbështetje për protestën e paralajmëruar nga Këshilli Drejtues, Këshilli i Prindërve dhe Shoqata Sindikaliste e Shkolla Pavarësia në Prishtinë, e cila do të mbahet të hënën, më 10.02.2026, nga ora 08:00.
Si pasojë e protestës, dy orët e para të mësimit nuk do të mbahen, ndërsa procesi mësimor do të vazhdojë normalisht nga ora e tretë. Ndërrimi i pasdites do të zhvillojë mësimin sipas orarit të rregullt.
Reagimi i SBASHK-së erdhi pas publikimit të një videoje nga KALLXO.com, ku shihet një mësimdhënës – tashmë i ndaluar për 48 orë me urdhër të prokurorit – duke goditur fizikisht një nxënës.
Megjithatë, SBASHK thekson se dhuna në shkolla nuk është një fenomen i njëanshëm, duke dënuar edhe sulmin fizik ndaj mësimdhënësit, si dhe rastet e shpeshta të fyerjeve, ofendimeve dhe sulmeve verbale ndaj mësimdhënësve nga nxënës e prindër.
“Këto raste nuk mund të trajtohen si incidente të izoluara, pasi po cenojnë rëndë dinjitetin e profesionit dhe sigurinë e procesit edukativo-arsimor”, thuhet në reagimin e SBASHK-së.
Sindikata kërkon:
-
hetim të shpejtë dhe të drejtë të rastit,
-
zbardhje të plotë të fakteve,
-
masa konkrete ndaj përgjegjësve,
-
përgjegjësi institucionale nga menaxhmenti i shkollës dhe Drejtoria e Arsimit,
-
zbatim të plotë të rregulloreve disiplinore.
SBASHK ka paralajmëruar se nëse nuk ka reagim institucional, do të shqyrtohet mundësia e ndërprerjes së mësimit edhe në shkolla të tjera të Prishtinës, si masë për mbrojtjen e mësimdhënësve dhe garantimin e një mjedisi të sigurt në arsimin publik.
Nga ana tjetër, Këshilli Drejtues, Këshilli i Prindërve dhe Shoqata Sindikale e Shkollës “Pavarësia” theksojnë se protesta synon të ngrejë zërin kundër dhunës fizike, sharjeve dhe sjelljeve delikuente të nxënësve, duke kërkuar angazhim serioz institucional dhe shoqëror për ta ndalur këtë fenomen shqetësues.
