E ngarkuara me punë në Ambasadën e Shteteve të Bashkuara të Amerikës në Prishtinë ka zhvilluar një takim me ministren e Ekonomisë, ku në fokus ka qenë zgjerimi i bashkëpunimit në sektorët strategjikë të energjisë dhe minierave.
Sipas njoftimit zyrtar, Ambasada amerikane ka ritheksuar angazhimin për të krijuar më shumë hapësira për bizneset amerikane në Kosovë, veçanërisht në sektorin e gazit të lëngshëm natyror dhe industrisë minerare, duke synuar rritjen e investimeve dhe zhvillimit ekonomik të ndërsjellë.
Ky bashkëpunim vjen në një moment kyç për sektorin energjetik në Kosovë, i cili vazhdon të përballet me sfida strukturore. Aktualisht, vendi nuk ka rrjet të zhvilluar të gazsjellësve dhe as infrastrukturë të plotë institucionale për menaxhimin e gazit natyror.
Në të njëjtën kohë, prodhimi i energjisë elektrike mbetet kryesisht i varur nga qymyri, me rreth 90 për qind të energjisë që sigurohet nga termocentralet ekzistuese, të cilat konsiderohen të vjetruara dhe me nevojë për modernizim.
Autoritetet kosovare kanë shprehur së fundi gatishmëri për të diversifikuar burimet energjetike, përfshirë mundësinë e furnizimit me gaz nga SHBA, si dhe zhvillimin e teknologjive të reja në këtë sektor.
Strategjia e Energjisë 2022–2031 parasheh gjithashtu lidhjen e mundshme të Kosovës me rrjetet rajonale të gazit në të ardhmen. Megjithatë, mungesa e daljes në det mbetet një pengesë e rëndësishme, duke e bërë bashkëpunimin me vendet fqinje thelbësor për ndërtimin e infrastrukturës së nevojshme.
Zhvillimet e fundit sinjalizojnë një orientim më të qartë drejt transformimit energjetik, ku partneriteti me SHBA mund të luajë rol kyç në sigurimin e burimeve alternative dhe rritjen e sigurisë energjetike në vend.
