Shtetet e Bashkuara të Amerikës festojnë sot 249-vjetorin e Pavarësisë, një nga datat më të rëndësishme në historinë e kombit amerikan. Më 4 korrik 1776, delegatët e 13 kolonive britanike nënshkruan Deklaratën e Pavarësisë, duke i dhënë fund sundimit britanik dhe duke hapur rrugën për krijimin e një shteti të pavarur.
Deklarata, e hartuar kryesisht nga Thomas Jefferson dhe e mbështetur nga figura të tjera të shquara si Benjamin Franklin, përbën aktin themelues të SHBA-së. Ajo erdhi si reagim ndaj padrejtësive ekonomike dhe politike të imponuara nga kurora britanike, përfshirë taksat e larta mbi mallrat e përditshme si sheqeri, çaji dhe pijet alkoolike, që kishin shkaktuar pakënaqësi të thellë mes kolonive.
Dita e Pavarësisë në SHBA shënohet tradicionalisht me parada madhështore, tubime publike, koncerte, grumbullime familjare dhe shfaqje spektakolare fishekzjarrësh në të gjithë vendin.
Në shenjë të miqësisë së ngushtë me SHBA-në, Republika e Kosovës i është bashkuar simbolikisht festimeve. Ndërtesa e Qeverisë në Prishtinë është ndriçuar me ngjyrat kuqe, bardh dhe blu – në nder të flamurit amerikan. Lajmi është bërë i ditur nga Ambasada e Kosovës në Uashington, e cila përmes një postimi në platformën X theksoi se ky akt simbolik përfaqëson “shenjë të mirënjohjes së thellë dhe miqësisë së palëkundur” mes Kosovës dhe Shteteve të Bashkuara.
Marrëdhëniet mes dy vendeve janë cilësuar ndër më të fuqishmet në arenën ndërkombëtare, me SHBA-në që ka luajtur një rol kyç në proceset e shtetformimit dhe të pavarësisë së Kosovës.
