Shtetet e Bashkuara kanë shtrënguar edhe një herë lakun ndaj regjimit të Nicolas Maduro-s, duke rikthyer sanksionet për tre nipër të presidentit venezuelian dhe duke vendosur masa të reja kundër gjashtë organizatave, kompanive të transportit dhe disa anijeve që, sipas Uashingtonit, mbështesin rrjetin e paligjshëm të pushtetit në Karakas.
Në njoftimin e Departamentit të Shtetit, Maduro etiketohet sërish si udhëheqësi i kartelit të drogës “Cartel de los Soles”, një strukturë që, sipas SHBA-së, ka rrënuar ekonominë e Venezuelës dhe ka destabilizuar Amerikën Latine.
“Ne do të vazhdojmë t’i ndërpresim financimet regjimit të paligjshëm të Maduros, i cili po shtyp popullin venezuelian,” thuhet në deklaratë.
Sanksionet vijnë pas sekuestrimit të një cisternë nafte
Përshkallëzimi i fundit ndodh vetëm një ditë pasi SHBA-të sekuestruan një anije që transportonte naftë bruto venezueliane — duke i hapur rrugë Uashingtonit për të ndaluar më lehtë anijet e dyshuara për shmangie të sanksioneve.
Në listën e individëve të goditur rikthehen nipërit e njohur si “Los Narcosobrinos”:
-
Efraín Antonio Campo Flores
-
Franqui Francisco Flores de Freitas
Të dy ishin dënuar për trafik kokaine në SHBA, por u falën personalisht nga presidenti Joe Biden në vitin 2022 në një shkëmbim të bujshëm të të burgosurve me Karakas. Sanksione u rivendosën edhe ndaj nipit të tretë, Carlos Erik Malpica Flores, i lidhur me kompaninë shtetërore të naftës PDVSA.
Në listën e zezë u shtua edhe biznesmeni panamez i naftës Ramon Carreter Napolitano.
Irani shpërthen: “Pirateri shtetërore amerikane!”
Reagimi i Teheranit ishte i menjëhershëm dhe tepër i ashpër. Ministria e Jashtme iraniane dënoi sekuestrimin e cisternës pranë brigjeve të Venezuelës, duke e quajtur:
“Shkelje flagrante të ligjit ndërkombëtar dhe akt piraterie në Karaibe.”
Anija e ndaluar pritet të transportohet drejt një porti amerikan, konfirmoi Shtëpia e Bardhë.
Zëdhënësja Caroline Leavitt paralajmëroi:
“Nuk do të rrimë duarkryq ndërsa anijet e sanksionuara lëvizin duke transportuar naftë të tregut të zi që financon narko-terrorizmin global.”
Venezuela reagon: “Një vjedhje ndërkombëtare”
Karakasi e quajti sekuestrimin:
-
“akt piraterie”
-
“vjedhje të hapur”
-
“shkelje të sovranitetit venezuelian”
Ndërkohë, Sekretari i Përgjithshëm i OKB-së Antonio Guterres shprehu shqetësim për përshkallëzimin e tensioneve dhe bëri thirrje për vetëpërmbajtje.
SHBA zgjeron luftën kundër trafikut: “Operacionet do të kalojnë në tokë”
Që nga shtatori, ushtria amerikane ka goditur anije të dyshuara për trafik droge në Karaibe dhe Paqësorin Lindor, duke vrarë afër 90 persona.
Presidenti Donald Trump njoftoi se operacionet së shpejti do të shtrihen edhe në territorin venezuelian.
Rusia në krah të Maduros
Në një bisedë telefonike, presidenti rus Vladimir Putin i garantoi Maduros mbështetje të plotë:
“Rusia qëndron me Venezuelën në mbrojtje të interesave dhe sovranitetit kombëtar.”
