Një hetim federal është iniciuar ndaj ish-prokurorit special Jack Smith, i cili ka udhëhequr dy çështje të profilit të lartë kundër ish-presidentit amerikan Donald Trump. Hetimi po zhvillohet nga Zyra e Këshilltarit Special – një agjenci e pavarur në kuadër të qeverisë federale të SHBA-së – lidhur me dyshime për përfshirje në veprimtari të ndaluara politike.
Lajmi është konfirmuar nga disa media të mëdha amerikane, përfshirë Associated Press dhe NBC News, të cilat raportojnë se hetimi ka nisur mbi bazën e akuzave të ngritura nga përfaqësues republikanë, përfshirë senatorin Tom Cotton. Sipas tyre, Smith mund të ketë shkelur Aktin Hatch – një ligj federal që ndalon zyrtarët publikë nga përfshirja në aktivitete politike të ndërlidhura me proceset zgjedhore.
Senatori Cotton ka publikuar një deklaratë në rrjetin social X (ish-Twitter), ku e akuzon Smith si një “demokrat partizan që ka përdorur ligjin si armë për të ndikuar në zgjedhjet presidenciale të vitit 2024.” Ai shtoi se ka kërkuar nga Zyra e Këshilltarit Special që të hetojë veprimet e Smith, për të cilat thotë se “me shumë gjasë kanë shkelur ligjin”.
Smith ishte emëruar si këshilltar special në nëntor të vitit 2022 nga atëherë Prokurori i Përgjithshëm, Merrick Garland, për të hetuar çështjet që lidheshin me trajtimin e dokumenteve të klasifikuara nga Trump si dhe përpjekjet e tij për të përmbysur rezultatin e zgjedhjeve të vitit 2020, të cilat i kishte humbur përballë Joe Biden.
Pas rizgjedhjes së Trump në nëntor të vitit 2024, të gjitha akuzat ndaj tij u mbyllën, për shkak të një praktike të kahershme në Departamentin Amerikan të Drejtësisë që e përjashton ndjekjen penale ndaj një presidenti në detyrë. Megjithatë, një raport i asaj kohe theksonte se, nëse Trump nuk do ta kishte fituar garën, ai do të ishte gjykuar për “përpjekje kriminale për të mbajtur pushtetin” pas zgjedhjeve të 2020-ës.
Shtëpia e Bardhë nuk ka komentuar ende lidhur me këtë zhvillim.
