Ambasada e Shteteve të Bashkuara në Prishtinë ka njoftuar se ka pezulluar në mënyrë të pacaktuar dialogun strategjik me Kosovën, për shkak të shqetësimeve lidhur me veprimet e qeverisë teknike, të cilat sipas njoftimit kanë rritur tensionet dhe pasigurinë, duke kufizuar mundësinë e bashkëpunimit produktiv mes dy vendeve.
Në deklaratë thuhet se SHBA mbetet e përkushtuar në avancimin e interesave të përbashkëta me popullin e Kosovës, duke theksuar se marrëdhëniet dypalëshe janë ndërtuar mbi qëllimin e përbashkët për forcimin e paqes dhe stabilitetit si bazë për mirëqenie ekonomike reciproke.
Megjithatë, Ambasada thekson se veprimet dhe deklaratat e kryeministrit teknik Albin Kurti kanë paraqitur sfida serioze për progresin e arritur ndër vite.
Dialogu strategjik ishte menduar të shërbente për forcimin e lidhjeve ekonomike dhe diplomatike në dobi të qytetarëve amerikanë dhe kosovarë. Në fund të deklaratës, SHBA shpreh shpresën që në të ardhmen, në kohën e duhur, këto përpjekje të mund të rifillojnë, duke qenë se ky është një synim i rëndësishëm për popullin e Kosovës.
