Zyrtarët amerikanë po presin zhvillime të rëndësishme nga bisedimet mes SHBA-së dhe Ukrainës që po mbahen në Florida. Sekretari i Shtetit, Marco Rubio, deklaroi të dielën se pret “më shumë përparim” drejt një marrëveshjeje që do t’i hapte rrugë përfundimit të luftës në Ukrainë.
“Nuk është vetëm çështje e një marrëveshjeje paqeje. Bëhet fjalë për krijimin e një rruge të sigurt përpara që e lë Ukrainën sovrane, të pavarur dhe të begatë. Për këtë arsye presim edhe më shumë përparim sot,” tha Rubio nga Hallandale Beach, ku po zhvillohen takimet.
Delegacioni ukrainas po udhëhiqet për herë të parë nga Rustem Umerov, Sekretar i Këshillit të Sigurisë Kombëtare, i cili mori drejtimin pas dorëheqjes së Andriy Yermak, shefit të kabinetit të presidentit Volodymyr Zelensky, mes skandalit të madh të korrupsionit në Kiev.
Në hapje të takimit, Umerov shprehu mirënjohje të qartë ndaj Shteteve të Bashkuara.
“SHBA-të po na dëgjojnë, SHBA-të po na mbështesin, SHBA-të po ecin përkrah nesh,” tha ai në anglisht, duke theksuar rolin kyç të Washingtonit.
Në takim morën pjesë edhe i dërguari special Steve Witkoff dhe Jared Kushner, dhëndri i presidentit amerikan Donald Trump, të cilët po përfaqësojnë palën amerikane. Bisedimet po zhvillohen në një klub privat pranë Miamit, Shell Bay, i cili është në pronësi të kompanisë së pasurive të patundshme të Witkoff.
Presidenti Zelensky ka paralajmëruar se pret që rezultatet e takimeve paraprake në Gjenevë të konkretizohen gjatë ditës së diel. Atje, Ukraina kishte paraqitur një kundërpropozim ndaj planit të hartuar nga Sekretari i Ushtrisë së SHBA-së, Dan Driscoll.
Ndërkohë, zëvendësministri i Jashtëm ukrainas, Sergiy Kyslytsya, ka nënvizuar kompleksitetin e procesit.
“Siç do të thoshte një meteorolog, atmosfera është një sistem kaotik ku ndryshimet e vogla mund të sjellin rezultate të mëdha,” shkroi ai në X nga Miami.
Takimet në Florida po konsiderohen vendimtare, pasi Uashingtoni dhe Kievi po kërkojnë një formulë të përbashkët që do t’i japë fund luftës, ndërsa tensionet diplomatike dhe sfidat politike në Ukrainë janë në rritje.
