Shtetet e Bashkuara të Amerikës do të ulin tarifat doganore për mallrat nga Zvicra nga 39% në 15%, sipas një marrëveshjeje të re tregtare që përfshin edhe një premtim për investime zvicerane në SHBA me vlerë 200 miliardë dollarë deri në fund të vitit 2028, njoftoi sot qeveria zvicerane.
Ministri Zviceran i Ekonomisë, Guy Parmelin, tha se marrëveshja e re e vendos Zvicrën në të njëjtat kushte tregtare me Bashkimin Evropian, i cili aktualisht përfiton nga e njëjta tarifë 15% për eksportet drejt tregut amerikan. Sipas tij, ky ndryshim do të sjellë lehtësim për afërsisht 40% të eksporteve zvicerane, të cilat ishin rënduar nga tarifat e larta gjatë viteve të fundit.
Në një deklaratë zyrtare, qeveria zvicerane bëri të ditur se marrëveshja përfshin edhe Lihtenshtajnin dhe se do të ulë detyrimet e importit për produktet industriale amerikane, peshkun, prodhimet e detit dhe disa produkte bujqësore të cilat “Zvicra i konsideron jo të ndjeshme”.
Gjithashtu, Zvicra do t’u japë SHBA-ve kuota tarifore pa taksa për 500 ton mish viçi, 1.000 ton mish bizoni dhe 1.500 ton mish shpendësh.
Grupet industriale zvicerane e kanë mirëpritur menjëherë marrëveshjen, duke e cilësuar si një fitore të madhe për konkurrueshmërinë e vendit dhe një balancim të lojës tregtare me BE-në.
“Në kuadrin e mëparshëm tarifor, Zvicra kishte humbur ndjeshëm terren – jo vetëm për shkak të forcës së frangës, por edhe sepse fqinjët evropianë paguanin vetëm rreth 15% tarifa”, tha Nadia Gharbi, ekonomiste në bankën zvicerane Pictet.
Sipas saj, ulja e tarifave eliminon një nga rreziqet më të mëdha për ekonominë zvicerane dhe përbën një zhvillim qartësisht pozitiv për industritë vendase dhe për perspektivën e rritjes afatmesme.
Megjithatë, para marrëveshjes, industria zvicerane kishte pësuar një rënie të ndjeshme të eksporteve në SHBA, me një ulje prej 14% në periudhën tre mujore deri në shtator, sipas të dhënave të shoqatës Swissmem.
Sektorët më të goditur ishin prodhuesit e pajisjeve industriale dhe veglave të makinerive, të cilët raportuan rënien më të madhe – deri në 43%.
Ekspertët e tregtisë presin që marrëveshja e re të ringjallë eksportet zvicerane, të rrisë investimet dypalëshe dhe të forcojë lidhjet ekonomike mes SHBA-së dhe Zvicrës, që tashmë po shihet si një partner strategjik në industrinë e teknologjisë dhe prodhimit të avancuar.
