Presidenti i Shtetet e Bashkuara, Donald Trump, ka njoftuar përshkallëzim të presionit ndaj Iranit, duke konfirmuar nisjen e një bllokade detare ndaj porteve iraniane.
Duke folur nga baza ushtarake Andrews në Maryland, Trump deklaroi prerë se Uashingtoni nuk do të lejojë që Irani të pajiset me armë bërthamore. “Irani nuk do të ketë armë bërthamore”, theksoi ai, duke akuzuar Teheranin se vazhdon të ndjekë këtë objektiv.
I pyetur për mundësinë e rifillimit të negociatave, Trump mbajti një qëndrim të ashpër, duke deklaruar se rikthimi në dialog nuk është prioritet. “Nuk më intereson nëse kthehen apo jo në bisedime. Nëse nuk kthehen, jam në rregull”, u shpreh ai.
Ndërkohë, ushtria amerikane ka bërë të ditur se bllokada detare do të hyjë në fuqi menjëherë, pas dështimit të bisedimeve mes dy vendeve. Masa përfshin ndalimin e anijeve të të gjitha shteteve që hyjnë apo dalin nga portet iraniane, si në Gjirin Persik ashtu edhe në Gjirin e Omanit.
Megjithatë, autoritetet amerikane kanë sqaruar se lundrimi në ngushticën strategjike të Hormuzit do të mbetet i hapur për anijet që nuk kanë lidhje me Iranin, me qëllim shmangien e një krize globale në furnizimin me energji.
Ky zhvillim shënon një rritje të ndjeshme të tensioneve në rajon, duke shtuar pasigurinë mbi stabilitetin në Lindjen e Mesme dhe tregjet ndërkombëtare të energjisë.
