Presidenti i Emirateve të Bashkuara Arabe, Sheikh Mohammed bin Zayed Al Nahyan (MBZ), ka vendosur t’i dhurojë ish-princit britanik Andrew Mountbatten-Windsor një vilë luksoze buzë detit, me vlerë rreth 10 milionë paund, që ndodhet në kompleksin e mbrojtur Sea Palace në Abu Dhabi.
Prona madhështore, në pronësi të familjes mbretërore emirate, ndodhet pranë selisë së Marinës së Emirateve dhe brenda rezidencës kryesore të familjes sunduese të Abu Dhabit. Vila përfshin të gjitha komoditetet e një rezidence moderne mbretërore dhe pritet të bëhet strehë e përhershme e princit të rrëzuar, i cili pas viteve të fundit të mbushura me skandale është tërhequr pothuajse plotësisht nga jeta publike.
Sipas “Mail on Sunday”, sheiku dhe princi Andrew njihen prej dekadash, që nga koha kur frekuentonin të njëjtën shkollë, Gordonstoun, në Mbretërinë e Bashkuar. Miqësia e tyre e gjatë ka mbetur e qëndrueshme, dhe Sheik Mohammed, 64 vjeç, ka urdhëruar personalisht rinovimin e plotë të vilës pas vdekjes së Mbretëreshës Elizabeth II.
Arkitektët që kanë punuar në projektin luksoz thonë se rezidenca e rinovuar kombinon madhështinë klasike aristokratike me një estetikë moderne dhe “plot gjallëri”, përmes toneve të ngjyrave të forta, mermerit të lëmuar dhe ndriçimit delikat. Vila përfshin gjashtë dhoma gjumi, një kinema private, një pishinë të brendshme, një palestër të pajisur plotësisht, si dhe një kuzhinë të madhe me shefa të nivelit të lartë. Çdo detaj, deri te çelësat, llambat dhe rubinetat, është i veshur me ar, në përputhje me shijen e rafinuar të familjeve mbretërore të rajonit.
Sea Palace, që daton që nga shekulli i 18-të, ishte përdorur fillimisht si pikë vrojtimi kundër grabitësve detarë dhe ka qenë në dispozicion të princit Andrew që prej vitit 2010. Në atë kohë, Pallati Buckingham kishte deklaruar se nuk bëhej fjalë për dhuratë, por për një grant të përkohshëm akomodimi.
Tani, pas rinovimit dhe njoftimeve të fundit, spekulohet se Andrew mund të shpërngulet përfundimisht në Emiratet e Bashkuara Arabe, duke e përdorur vilën si rezidencë të dytë mes Abu Dhabit dhe Britanisë. Besohet gjithashtu se prona është përdorur më herët edhe nga vajzat e tij, Princeshat Beatrice dhe Eugenie.
Ky veprim shihet si shenja më e fundit e afërsisë personale midis Princit Andrew dhe Sheikh Mohammed bin Zayed, i cili ka ruajtur marrëdhënie të ngushta me shumë anëtarë të familjes mbretërore britanike, por me Andrew-n në veçanti – një miqësi që, mesa duket, po shpërblehet me luks mbretëror në brigjet e artë të Gjirit Persik.
