Një veprim shembullor qytetar është shënuar mbrëmjen e 1 janarit 2026 në Ferizaj, ku një qytetar ka gjetur një çantë të humbur me para dhe dokumente personale dhe e ka dorëzuar menjëherë në polici.
Sipas njoftimit të Policia e Kosovës, rreth orës 21:00 në stacionin policor është paraqitur qytetari D. Mehmetaj, i cili ka njoftuar se rreth orës 20:30, në rrugën “Zenel Hajdini”, kishte gjetur një çantë të humbur.
Në prani të zyrtarëve policorë, është bërë kontrollimi i çantës, ku janë gjetur:
-
një patentë shoferi,
-
kartëmonedha në vlerë prej 350 euro,
-
para metalike në vlerë rreth 3 euro,
-
si dhe gjësende të tjera personale.
Pas verifikimeve të kryera nga policia, është identifikuar pronarja e çantës, znj. L. M., e cila është njoftuar menjëherë dhe rreth orës 21:20 është paraqitur në stacionin policor për ta marrë çantën e saj.
Drejtoria Rajonale e Policisë në Ferizaj ka falënderuar publikisht qytetarin D. Mehmetaj për veprimin e tij të ndershëm dhe bashkëpunimin me institucionet, duke e cilësuar këtë rast si një shembull të mirë qytetarie, ndershmërie dhe përgjegjësie shoqërore.
