Një ekip studiuesish nga Shkolla e Inxhinierisë Viterbi dhe Shkolla e Informatikës së Avancuar në Universitetin e Kalifornisë Jugore (USC) ka zhvilluar një teknologji revolucionare: neurone artificiale që imitojnë kiminë reale të trurit të njeriut.
Risia e tyre mund të ndryshojë rrënjësisht mënyrën si ndërtohen sistemet e inteligjencës artificiale, duke i bërë ato më të vogla, më të shpejta dhe shumë më efikase në energji.
Në vend që të përdorin simulime dixhitale si çipat neuromorfikë ekzistues, neuronet e reja të USC përdorin procese të vërteta kimike dhe elektrike për përpunimin e informacionit — pra, nuk imitojnë trurin, por funksionojnë si ai.
Kërkimi, i udhëhequr nga profesori Joshua Yang, bazohet në një teknologji të quajtur “memristor difuziv”, ku informacioni përpunohet përmes lëvizjes së atomeve dhe joneve të argjendit në oksid — një parim që pasqyron mënyrën si komunikojnë qelizat nervore reale.
“Argjendi na jep dinamikën e nevojshme për të imituar biosistemin dhe për të rikrijuar funksionin e neuroneve me një strukturë shumë të thjeshtë,” tha Yang.
Çdo neuron artificial zë vetëm hapësirën e një tranzistori të vetëm, duke ulur ndjeshëm kompleksitetin e pajisjeve dhe konsumin e energjisë. Yang thekson se problemi kryesor i sistemeve aktuale të kompjuterëve nuk është fuqia, por mungesa e efikasitetit, ndërsa truri i njeriut arrin të mësojë dhe të njohë modele me vetëm 20 vat energji.
Ekipi beson se kjo teknologji mund të sjellë sisteme IA që mësojnë në mënyrë të ngjashme me trurin e njeriut, duke hapur rrugën drejt inteligjencës së përgjithshme artificiale (AGI).
Faza e ardhshme e kërkimit do të fokusohet në integrimin e rrjeteve më të mëdha neuronale dhe testimin e aftësisë së tyre për të mësuar në mënyrë autonome. Përveç përparimit në IA, studiuesit theksojnë se këto sisteme mund të ndihmojnë edhe në kuptimin më të thellë të funksioneve të trurit të njeriut.
Studimi është botuar në revistën shkencore Nature Electronics.
