Në një mbrëmje elektrizuese në “Todor Proeski Arena” të Shkupit, Shkëndija e Tetovës arriti një fitore historike duke mposhtur 2-1 kampionët e Bullgarisë, Ludogorets, në ndeshjen e parë të play-off-it të Europa League.
Miqtë shënuan të parët në minutën e 17-të me golin e Deroy Duarte, por kuqezinjtë e trajnerit Jeton Beqiri reaguan shpejt. Vetëm pas 18 minutash, Liridon Latifi realizoi një supergol nga goditja e lirë, duke barazuar rezultatin dhe ndezur atmosferën në tribuna.
Pjesa e dytë solli momentin e artë për kapitenin Besart Ibraimi, i cili në minutën e 60-të shënoi golin e fitores pas asistimit të Latifit. Portieri Gaye u shndërrua në hero me pritje vendimtare, duke siguruar avantazhin deri në fund.
Me këtë rezultat, Shkëndija jo vetëm që mban shpresa të mëdha për kualifikim në grupet e Europa League, por ka siguruar edhe pjesëmarrjen në grupet e Conference League.
Ndeshja e kthimit zhvillohet javën e ardhshme në Razgrad, ku tetovarët do të kërkojnë të shkruajnë një faqe të artë në historinë e klubit.
