Aktivistja dhe familjarja e ish-luftëtarëve të UÇK-së, Shqipe Mehmeti Selimi, ka reaguar në një postim në profilin e saj personal në Facebook, duke kritikuar ashpër themelimin e Gjykatës Speciale dhe qëndrimin e disa politikanëve ndaj saj.
Në reagimin e saj, Mehmeti Selimi thekson se 82 deputetë të Kuvendit të Kosovës kishin votuar pro themelimit të kësaj gjykate, përfshirë 30 nga PDK, 34 nga LDK dhe 18 nga partitë e komuniteteve pakicë.
Ajo shprehet e bindur se disa prej deputetëve që votuan pro, sot dalin në protesta kundër asaj që vetë e kanë miratuar.
Duke e lidhur këtë vendimmarrje me zhvillimet aktuale në Hagë, Mehmeti Selimi i quan ato “pasojë direkte” e asaj vote të vitit të kaluar.
Ajo gjithashtu sqaroi se nuk ishte e vetmja familjare që mungoi në protestën e fundit, por sipas saj, portalet përmendën vetëm emrin e saj “për të sulmuar Lëvizjen Vetëvendosje”.
Në përfundim, Mehmeti Selimi thekson se, po të kishte arsye për të protestuar, do ta fillonte nga ky “fakt i pamohueshëm” i themelimit të Gjykatës Speciale.
