Sot në Luksemburg do të mbahet Konferenca e Katërt Ndërqeveritare Shqipëri-Bashkimi Evropian, ku do të marrë pjesë edhe kryeministri Edi Rama. Mbajtja e konferencës u vendos me konsensus nga ambasadorët e 27 vendeve anëtare të BE-së në Bruksel, nën presidencën polake të Unionit.
Ky takim do të shënojë një hap të rëndësishëm në rrugëtimin evropian të Shqipërisë, duke mundësuar hapjen e negociatave për grup-kapitullin 2 – Tregu i Brendshëm. Kjo përfshin një numër kapitujsh të rëndësishëm:
-
Kapitulli 1: Lëvizja e lirë e mallrave
-
Kapitulli 2: Liria e lëvizjes së punonjësve
-
Kapitulli 3: E drejta e themelimit dhe liria për të ofruar shërbime
-
Kapitulli 4: Lëvizja e lirë e kapitalit
-
Kapitulli 6: E drejta e kompanive
-
Kapitulli 7: E drejta e pronësisë intelektuale
-
Kapitulli 8: Politika e konkurrencës
-
Kapitulli 28: Mbrojtja e konsumatorit dhe shëndetit
Ky është hapi i tretë konkret në procesin e negociatave, pas hapjes së grup-kapitullit të parë më 15 tetor, që përfshinte çështjet “Themelore” si drejtësia, sundimi i ligjit dhe të drejtat themelore, si dhe diskutimeve të nisura më 17 dhjetor për grup-kapitullin 6, që përfshin marrëdhëniet e jashtme, politikën e sigurisë dhe atë të mbrojtjes.
