Shqipëria ka marrë miratimin për hapjen e negociatave për Grupkapitullin 4 “Agjenda e Gjelbër dhe Ndërlidhja e Qëndrueshme”, një tjetër hap domethënës në rrugëtimin drejt anëtarësimit në Bashkimin Europian.
Lajmi është konfirmuar edhe nga Kryeministri Edi Rama, i cili në një postim në rrjetet sociale e ka cilësuar këtë zhvillim si “një tjetër dëshmi e progresit konkret të Shqipërisë drejt integrimit europian”.
“Shqipëria nuk ndalet. Një tjetër hap i rëndësishëm drejt anëtarësimit në BE,” – ka shkruar Rama, duke theksuar se ky vendim i vendeve anëtare të BE-së konfirmon përgatitjen tonë dhe progresin e bërë në rrugën drejt familjes europiane.
Grupkapitulli 4 përfshin katër kapituj kyç që lidhen drejtpërdrejt me zhvillimin e qëndrueshëm, mjedisin dhe ndërlidhjen infrastrukturore të vendit me rrjetin europian:
-
Kapitulli 14 – Politikat e transportit
-
Kapitulli 15 – Energjia
-
Kapitulli 21 – Rrjetet trans-evropiane
-
Kapitulli 27 – Mjedisi dhe klima
Kryeministri e ka përshkruar këtë hap si një element themelor për ndërtimin e “Shqipërisë 2030 – vend krenar i Bashkimit Europian”, duke nënvizuar rëndësinë që ka për jetën e përditshme të qytetarëve, ekonominë dhe sigurinë energjetike e mjedisore të vendit.
Miratimi i këtij grupkapitulli shënon një tjetër pikë kthese në procesin e negociatave, duke hapur rrugën për diskutime më të thelluara mbi sektorët strategjikë dhe përafrimin e standardeve të BE-së në fushat më jetike për zhvillimin e vendit.
