Shqipëria ka përmbyllur ciklin e raportimeve me Komisionin Europian për kapitujt 23 dhe 24, të cilët përfshihen në grupin e parë të negociatave me Bashkimin Europian – të ashtuquajturit “Kapitujt e Themeloreve”, që lidhen me drejtësinë dhe të drejtat themelore.
Ministri i Drejtësisë, Ulsi Manja, përmes një reagimi në rrjetet sociale, e cilësoi këtë fazë si një dëshmi konkrete se “shteti i së drejtës ndërtohet me punë të përditshme, bashkëpunim institucional dhe rezultate të prekshme”. Ai bëri të ditur se gjatë këtij procesi, Ministria e Drejtësisë ka udhëhequr 21 takime raportuese, me mbi 85 orë diskutime dhe negociata, duke përgatitur rreth 3,500 faqe dokumentacion teknik.
“Tabelat e përputhshmërisë, draft-ligjet, relacionet shpjeguese dhe analizat cilësore tregojnë qartë për një proces që ecën me standardet më të larta europiane,” theksoi Manja.
Kapitulli 23 “Drejtësia dhe të drejtat themelore” dhe kapitulli 24 “Drejtësia, liria dhe siguria” janë ndër më sfiduesit në rrugëtimin e Shqipërisë drejt anëtarësimit në BE. Këto kapituj kërkojnë jo vetëm përafrim të legjislacionit kombëtar me acquis communautaire – trupën ligjore të BE-së – por edhe zbatim të qëndrueshëm të reformave ligjore, politike dhe administrative.
Negociatat zhvillohen përmes Konferencës Ndërqeveritare, ndërmjet përfaqësuesve të qeverive të vendeve anëtare dhe vendit kandidat. Shqipëria ka hapur deri më tani grupin e parë të negociatave, i cili përfshin kapitujt më themelorë për garantimin e shtetit ligjor dhe të drejtave të njeriut.
Ky hap konsiderohet thelbësor në rrugën drejt anëtarësimit të plotë në Bashkimin Europian.
