Shqipëria është një hap më afër Bashkimit Evropian, teksa këtë vjeshtë do të hapë dy grupkapitujt e fundit të negociatave për anëtarësim. Më 16 shtator pritet të mbahet konferenca ndërqeveritare për çeljen e grupkapitullit “Axhenda e Gjelbër”, ndërsa më 2 tetor është parashikuar hapja e “Bujqësisë dhe Kohezionit”, duke i hapur rrugë vendit për nisjen e bisedimeve mbi të gjithë 33 kapitujt.
Burime zyrtare bëjnë me dije se Shqipëria ka çelur deri më tani katër nga gjashtë grupkapitujt: Themeloret, Marrëdhëniet me Jashtë, Tregu i Brendshëm dhe Konkurrueshmëria e Rritja Gjithëpërfshirëse.
Që nga data 19 korrik 2022, kur u mbajt konferenca e parë ndërqeveritare me BE-në, vendi ka përparuar me hapjen e kapitujve kryesorë. Në tetor dhe dhjetor 2024, Shqipëria çeli “Themeloret” dhe “Marrëdhëniet me Jashtë”, ndërsa në prill dhe maj 2025 u hapën kapitujt e Tregut të Brendshëm dhe Konkurrueshmërisë dhe Rritjes Gjithëpërfshirëse.
Sipas Bashkimit Evropian, Shqipëria ka potencial të përfundojë procesin e integrimit në union brenda vitit 2030. Kryeministri Edi Rama e ka shpallur anëtarësimin në BE si prioritet kryesor të mandatit të tij të katërt qeverisës.
Përmbajtja e kapitujve që do të hapen këtë vjeshtë:
Axhenda e Gjelbër (16 shtator)
-
Politika e transportit
-
Energjia
-
Rrjetet trans-evropiane
-
Mjedisi dhe ndryshimet klimatike
Bujqësia dhe Kohezioni (2 tetor)
-
Bujqësia dhe zhvillimi rural
-
Siguria ushqimore, politika veterinare dhe fitosanitare
-
Peshkimi
-
Politika rajonale dhe koordinimi i instrumenteve strukturore
-
Dispozitat financiare dhe buxhetore
Me hapjen e këtyre dy kapitujve, Shqipëria afrohet më pranë përmbushjes së të gjithë detyrimeve për anëtarësim dhe konsolidimit të reformave të brendshme në përputhje me standardet e Bashkimit Evropian.
