Shqipëria do të zhvillojë sot ndeshjen e parë miqësore ndaj Gjibraltarit, e cila do t’i shërbejë stafit teknik si test para përballjes zyrtare kundër Letonisë më 9 shtator në “Air Albania”.
Kuqezinjtë përfunduan dje përgatitjet në Malaga të Spanjës, ku trajneri Silvinjo përcaktoi formacionin dhe lojtarët që do të zbresin në fushë. Kjo sfidë pritet të përdoret për të provuar gjendjen e skuadrës, si dhe për t’u dhënë minuta lojtarëve që nuk kanë pasur hapësira deri më tani.
Formacioni i mundshëm:
Në portë pritet të nisë Strakosha, ndërsa minuta mund të ketë edhe për Dajsinanin. Mbrojtja do të përbëhet nga Kumbulla dhe Gjimshiti në qendër, me Balliun në të djathtë dhe Alijin në të majtë. Në mesfushë, treshja Berisha–Shehu–Asllani pritet të mbështesë sulmin e përbërë nga Daku në qendër, me Bajramin dhe Hoxhën në krahë.
Takimi historik:
Kjo është hera e parë që Shqipëria përballet me Gjibraltarin, pasi të dyja kombëtaret nuk janë ndeshur më parë. Sfidën do ta presë stadiumi “Europa Point” në Gjibraltar, me fillim nga ora 18:00.
Agjenda e kuqezinjve:
Skuadra është grumbulluar prej disa ditësh në Spanjë, ku ka zhvilluar seancat stërvitore për ndeshjen e sotme. Udhëtimi drejt stadiumit do të bëhet menjëherë para takimit, ndërsa pas përfundimit lojtarët do të kthehen në hotel. Nesër pritet rikthimi në Tiranë, ku do të nisin përgatitjet finale për sfidën e rëndësishme ndaj Letonisë.
