Sot shqiptarët i drejtohen kutive të votimit për të zgjedhur 140 përfaqësuesit e rinj të Kuvendit të Shqipërisë. Procesi i votimit ka nisur në orën 07:00 dhe do të përfundojë në orën 19:00, duke shënuar një nga ngjarjet më të rëndësishme politike të vitit.
Rreth 3.7 milionë qytetarë janë thirrur të ushtrojnë të drejtën e votës, ndërsa risi e këtyre zgjedhjeve është përfshirja për herë të parë e diasporës shqiptare në votim. Janë 245.935 emigrantë që janë regjistruar për të votuar nga jashtë vendit, duke kontribuar në përfaqësimin e tyre në parlamentin e ardhshëm.
Në garën për të siguruar shumicën në Kuvendin me 140 ulëse, konkurrojnë 11 subjekte dhe koalicione politike, me lista të hapura dhe të mbyllura. Secili subjekt garon me 186 kandidatë, prej të cilëve 46 janë nga lista e mbyllur, sipas të dhënave zyrtare të Komisionit Qendror të Zgjedhjeve (KQZ).
Subjektet dhe drejtuesit në garë janë:
-
Partia Demokratike – Aleanca për Shqipërinë Madhështore, drejtuar nga Sali Berisha
-
Partia Socialiste e Shqipërisë, drejtuar nga Edi Rama
-
Koalicioni Euroatlantik, drejtuar nga Endri Hasa
-
Lëvizja Bashkë, drejtuar nga Arlind Qori
-
Lëvizja Atdheu, drejtuar nga Kreshnik Osmani
-
Koalicioni Nisma Shqipëria Bëhet, drejtuar nga Adriatik Lapaj
-
Aleanca Kombëtare Shqiptare, drejtuar nga Elena Kocaqi
-
Aleanca Demokracia e Re, drejtuar nga Edmond Stojku
-
Koalicioni Djathtas për Zhvillim, drejtuar nga Dashamir Shehi
-
Mundësia, drejtuar nga Agron Shehaj
-
Partia Socialdemokrate, drejtuar nga Tom Doshi
Sot pritet një ditë vendimtare për të ardhmen politike të Shqipërisë, ndërsa fokusi është te pjesëmarrja qytetare, procesi i qetë zgjedhor dhe transparenca e rezultatit final.
