Presidenti i SHBA-së, Donald Trump, ka ngritur dyshime serioze mbi të ardhmen e vendit të tij në NATO, duke e cilësuar aleancën si të dështuar gjatë konfliktit të fundit me Iranin.
Deklarata u bë nga zëdhënësja e Shtëpisë së Bardhë, Karoline Leavitt, e cila konfirmoi se çështja e mundshme e tërheqjes së SHBA-ve nga NATO është tashmë në tavolinë dhe pritet të diskutohet në takimin e sotëm mes Trump dhe sekretarit të përgjithshëm të aleancës, Mark Rutte.
“Kjo është një çështje që presidenti e ka diskutuar dhe do ta trajtojë sërish në takimin me sekretarin e përgjithshëm. Mund të ketë deklarata të drejtpërdrejta pas takimit”, tha Leavitt.
Takimi zhvillohet në një moment të tensionuar për marrëdhëniet mes SHBA-ve dhe aleancës, ndërsa Trump ka shtuar kritikat ndaj NATO-s, duke e quajtur atë një “tigër letre” dhe duke akuzuar aleatët për mungesë mbështetjeje gjatë luftës me Iranin.
“Ata nuk kanë qenë miqtë tanë kur kemi pasur nevojë për ta”, është shprehur më herët presidenti amerikan.
Deklaratat e fundit kanë rritur shqetësimet për një përçarje të mundshme brenda aleancës, në një kohë kur siguria globale mbetet e brishtë dhe tensionet gjeopolitike në rritje.
