Një shtetas i Republikës së Kosovës, Mit’hat Lozhani, është arrestuar të enjten, më 5 shkurt, gjatë kalimit transit nëpër territorin e Serbisë.
Lajmin e ka konfirmuar avokati i tij, Arianit Koci, i cili ka bërë të ditur se arrestimi ka ndodhur rreth orës 11:00.
“Sot, rreth orës 11:00, gjatë kalimit transit nëpër Serbi, u ndalua dhe u arrestua nga policia serbe shtetasi i Kosovës, Mit’hat Lozhani. Ky nuk është rast i izoluar. Arrestimet e shtetasve të Kosovës gjatë transitit nëpër Serbi po përsëriten dhe kjo po krijon pasiguri reale për këdo që udhëton përmes atij territori”, ka deklaruar Koci.
Sipas tij, autoritetet e Kosovës duhet ta trajtojnë këtë çështje si problem serioz sigurie, duke kërkuar edhe ndërmjetësimin e bashkësisë ndërkombëtare.
“Diplomacia jonë duhet të reagojë fuqishëm, pa përjashtuar masa konkrete politike, përfshirë edhe mbylljen 24-orëshe të kufirit, nëse arrestimet vazhdojnë”, ka shtuar ai.
Reagimi i OVL UÇK-së
Arrestimin e Lozhanit e ka konfirmuar edhe Organizata e Veteranëve të Luftës së UÇK-së. Nënkryetari i kësaj organizate, Gazmend Syla, ka deklaruar për Radio Evropa e Lirë se arrestimi ka ndodhur në kufirin mes Serbisë dhe Kroacisë.
Sipas Sylës, gjatë kontrollit Lozhanit i është gjetur kartela e anëtarësisë si veteran i UÇK-së.
Ai ka sqaruar se Lozhani ka marrë pjesë në disa stërvitje në Shqipëri, por nuk ka qenë aktiv në frontin e luftës në Kosovë.
Thirrje për veprim shtetëror
Avokati Koci ka theksuar se, ndonëse po bën maksimumin në aspektin ligjor, mbrojtja e qytetarëve të Kosovës nuk mund të mbetet vetëm në nivel individual.
“Kjo është përgjegjësi e shtetit, brenda dhe jashtë kufijve të tij”, ka përfunduar ai.
Rasti i Mit’hat Lozhanit vjen në një kohë kur janë shënuar disa arrestime të ngjashme të shtetasve të Kosovës gjatë transitit nëpër Serbi, duke ngritur shqetësime serioze për sigurinë dhe lirinë e lëvizjes.Burimi: Paparaci.com
