Sot shënohet 27-vjetori i rënies heroike të Fehmi e Xhevë Lladrovcit, dy figurave që u bënë emblema të dashurisë për atdheun dhe sakrificës sublime për liri. Çifti legjendar i luftës kujtohet si simbol i pathyeshëm i qëndresës dhe i përjetësimit të idealit për Kosovën e lirë.
Në të njëjtën ditë, më 22 shtator 1998, ranë edhe dëshmorët Behxhet Karaxha, Milazim Karaxha, Hamit Lladrovci, Fatime Hetemi dhe Shefqet Zeka, duke lënë pas një gjurmë të pashlyeshme në historinë e kombit.
Për nder të tyre, Komuna e Drenasit ka paralajmëruar se sot, duke filluar nga ora 11:00, në Kompleksin e Varrezave të Dëshmorëve në Gllanasellë, do të mbahen homazhe dhe përkujtime solemne, ku qytetarë, familjarë dhe përfaqësues institucionalë do të përkulen me respekt para veprës së tyre.
“Sakrifica e Fehmi dhe Xhevë Lladrovcit është themel i lirisë sonë. Ata jetojnë në çdo frymë të këtij populli, në çdo hap mbi tokën e lirë të Kosovës”, thuhet në njoftimin e komunës.
Fehmi e Xhevë Lladrovci mbeten në kujtesën kolektive si heronj të pavdekshëm, që me jetën e tyre dëshmuan se dashuria për atdheun është mbi çdo gjë.
Lavdi e përjetshme Fehmi e Xhevë Lladrovcit, dëshmorëve dhe të gjithë të rënëve për liri!
