Presidentja e Kosovës, Vjosa Osmani, ka dhënë sinjale të tërthorta për një rikthim të mundshëm në skenën partiake, duke lënë të hapur mundësinë e përfshirjes së saj në Lidhja Demokratike e Kosovës pas përfundimit të mandatit presidencial.
Gjatë një takimi me qytetarë, Osmani u shpreh se deri më 4 prill – datë kur i përfundon mandati – nuk mund të komentojë çështje politike, por la të kuptohet se diskutimet publike për të ardhmen e saj janë të hapura. Deklarata e saj është interpretuar si një sinjal i kujdesshëm për një rikthim të mundshëm në politikën aktive.
Në të njëjtën linjë, kryetari i LDK-së, Lumir Abdixhiku, ka artikuluar prej javësh idenë e një “bashkimi të madh” të së djathtës në Kosovë, duke e konsideruar Osmanin një figurë kyçe në këtë projekt politik.
Abdixhiku ka theksuar nevojën për tejkalimin e ndarjeve të së kaluarës dhe ndërtimin e një fronti të përbashkët politik me orientim të qartë euroatlantik, duke lënë të kuptohet se LDK synon të rikthejë dhe konsolidojë elektoratin e djathtë përmes një platforme më të gjerë bashkimi.
Edhe pse Osmani aktualisht nuk mund të angazhohet drejtpërdrejt në aktivitete partiake për shkak të postit që mban, zhvillimet e fundit po ushqejnë spekulimet për një rikthim të saj në LDK, aty ku edhe nisi karrierën politike.
Me afrimin e datës 4 prill, kur përfundon mandati presidencial, pritet që skena politike në Kosovë të marrë një dinamikë të re, ku roli i Vjosa Osmani mund të jetë përcaktues për riformatimin e kampit të djathtë.
