Agjencia e Menaxhimit Emergjent ka njoftuar se pas një pasditeje me situatë të rënduar nga zjarret, numri i vatrave aktive ka rënë ndjeshëm gjatë 12 orëve të fundit, falë reagimit të shpejtë të ekipeve zjarrfikëse dhe ndihmës nga reshjet e shiut.
Sipas njoftimit zyrtar, aktualisht vetëm një zjarr mbetet aktiv në fshatin Trudë, në Komunën e Prishtinës, ku ekipet profesionale të Zjarrfikjes dhe Shpëtimit ndodhen ende në terren për ta lokalizuar dhe shuar plotësisht.
Agjencia u bën thirrje qytetarëve që të tregojnë kujdes maksimal, të shmangin çdo veprim që mund të shkaktojë zjarr, dhe të raportojnë menjëherë çdo vatër të dyshimtë tek autoritetet përkatëse.
“Falënderojmë zjarrfikësit për përkushtimin e tyre të palodhshëm, Policinë e Kosovës dhe KFOR-in për mbështetjen, si dhe qytetarët për bashkëpunimin e treguar,” thuhet në komunikatë.
Autoritetet po monitorojnë situatën nga afër dhe mbeten të gatshme për ndërhyrje të menjëhershme në rast të përkeqësimit të kushteve.
