Në komunikatën e lëshuar nga Kuvendi i Kosovës ku njoftohet për vizitën në Kuvend nga bashkatdhetarët për tri ditë rresht, në një rresht fajësohen deputetët e PDK’së dhe AAK’së se prania e tyre në sallën plenare pa pasë seancë çoi në ndërprerjen e vizitës.
“Në ditën e tretë vizita e sallës plenare u ndërpre për disa minuta, pasi deputetë të PDK-së dhe të AAK-së kishin zënë sallën plenare në një kohë kur nuk ishte thirrur asnjë seancë”, thuhet në komunikatën e Kuvendit.
Për këtë kanë reaguar deputetët e PDK’së, të cilët e cilësuan si “skandaloze” dhe thanë se këtë çështje do ta adresojnë te sekretariati i Kuvendit.
“Fatkeqësisht, Kuvendi është marrë peng prej një partie politike e cila provon përmes diktatit ta nënshtrojë edhe administratën e Kuvendit”, tha deputetja Blera Deliu-Kodra.
“Kuvendi i Republikës nuk është i një partie politike. Nuk mundet që një parti politike ta shantazhojë administratën e Kuvendit”, tha ajo.
Deputeti tjetër i PDK-së, Artan Behrami, tha se para zyrës së mediave të Kuvendit të gjitha grupet parlamentare duhet të jenë të njëjtë.
Komunikata e plotë e Kuvendit:
Rreth një mijë bashkatdhetarë vizituan Kuvendin e Republikës së Kosovës
Për tri ditë me radhë, rreth një mijë bashkatdhetarë nga vende të ndryshme të botës vizituan Kuvendin e Republikës së Kosovës, në kuadër të aktivitetit të përvitshëm “Bashkatdhetarët në Kuvend”.
Edhe sot, bashkatdhetarët u pritën nga Kryetarja e Kuvendit të Republikës së Kosovës, U.D. Presidente, Albulena Haxhiu, në ambientet e punës së Kuvendit. Gjatë qëndrimit, ata u pritën gjithashtu nga deputetë dhe zyrtarë të administratës së Kuvendit, të cilët i shoqëruan përgjatë vizitës dhe i informuan më nga afër për punën, funksionimin, përgjegjësitë dhe rolin e Kuvendit si institucioni më i lartë përfaqësues dhe ligjvënës i Republikës së Kosovës.
Po ashtu, bashkatdhetarët patën mundësi të njihen drejtpërdrejt me hapësirat e Kuvendit, përfshirë sallën plenare, si dhe me historikun, veprimtarinë dhe rëndësinë e këtij institucioni në jetën demokratike të vendit. Në ditën e tretë vizita e sallës plenare u ndërpre për disa minuta, pasi deputetë të PDK-së dhe të AAK-së kishin zënë sallën plenare në një kohë kur nuk ishte thirrur asnjë seancë.
Këto tri ditë me bashkatdhetarë në Kuvend krijuan hapësirë për bashkëbisedim të drejtpërdrejtë dhe shkëmbim mendimesh me përfaqësuesit e zgjedhur të qytetarëve.
Aktiviteti “Bashkatdhetarët në Kuvend”, i cili u përmbyll sot, përçon një mesazh të rëndësishëm për lidhjen e qëndrueshme ndërmjet Kosovës dhe mërgatës së saj.
