Njësia për Hetimin e Krimeve Kibernetike në Gjilan ka zbuluar një skemë të organizuar mashtrimi financiar në sistemin ndërkombëtar të transferimit të parave Western Union, ku në epiqendër të hetimeve ndodhet menaxheri i një pike në fshatin Piranë të Prizrenit.
I dyshuari kryesor, Muharrem Morina, 63 vjeç, menaxher i pikës lokale, akuzohet se ka lejuar tërheqje të paligjshme të shumave të ndryshme të parave në emër të personave të tretë, pa praninë, dijeninë apo dokumentacionin identifikues të tyre. Këto veprime, sipas hetimeve, përbëjnë shkelje serioze të protokolleve të sigurisë të përcaktuara nga Western Union.
Në bazë të informatave të siguruara deri tani, Morina dyshohet se ka vepruar me dijeni të plotë për pasojat, duke lehtësuar përfitimet e paligjshme të personave të tjerë të përfshirë në këtë rrjet, konkretisht M.G, S.I., Q.I. dhe Sh.I., të cilët thuhet se kanë përfituar duke përdorur në mënyrë të kundërligjshme identitetet e viktimave L.L. dhe F.V.
Rasti është kualifikuar si “Keqpërdorim i besimit” sipas nenit 330 të Kodit Penal të Republikës së Kosovës. Hetimet janë në vijim dhe autoritetet kanë paralajmëruar mundësinë e zgjerimit të listës së të dyshuarve, përderisa ekziston dyshimi i bazuar se skema përfshin bashkëpunëtorë të tjerë brenda dhe jashtë pikave të rrjetit Western Union.
Autoritetet kanë bërë thirrje për vigjilencë të shtuar dhe bashkëpunim nga qytetarët që mund të jenë prekur nga kjo formë e vjedhjes së identitetit.
