Kosova po hyn në orët e fundit të një prej hapave më të rëndësishëm zgjedhorë. Sot, në orën 23:59, përfundon afati zyrtar për dorëzimin e listave të kandidatëve për deputetë për zgjedhjet e parakohshme parlamentare që do të mbahen më 28 dhjetor 2025.
Deri në këtë fazë, janë mbyllur tashmë tre procese kyçe që prekin subjektet politike. Afatet për:
-
Aplikimin për certifikim të subjekteve që synojnë garën,
-
Formimin e koalicioneve parazgjedhore,
-
Si dhe njoftimet për mospjesëmarrje në zgjedhje,
kanë përfunduar më 30 nëntor, po ashtu në orën 23:59. Këto hapa kanë shënuar filtrimin e parë të garuesve dhe pozicionimin politik për betejën e fundvitit.
Ndërkohë, ora politike nuk ndalet. Më 17 dhjetor nis zyrtarisht fushata elektorale, periudha kur partitë do të kërkojnë zemrën, mendjen dhe votën e qytetarëve. Me skenën tashmë të qartë dhe listat që mbyllen sonte, garës i ka mbetur vetëm të ndizet.
