Sot në orën 09:30 fillon Konferenca e Ambasadorëve Diplo2025, me temën “Shqipëria 2030: në Evropë, e ndërlidhur me botën”, e cila do të zhvillohet gjatë datave 8-10 shtator. Në ngjarje pritet të jenë të pranishëm kryeministri Edi Rama, ambasadori i Bashkimit Evropian në Tiranë, Silvio Gonzato, si dhe përfaqësues politikë nga rajoni.
Hapja e konferencës është parashikuar nga ora 09:30 deri 10:30, me fjalën e ministrit të Jashtëm Igli Hasani, dhe më pas të kryeministrit Rama, e cila do të pasojë me një foto familjare. Në këtë ngjarje do të marrë pjesë si i ftuar nderi, ministri i Jashtëm i Qipros, Constantinos Kombos, i cili do të mbajë fjalën e tij rreth orës 10:30-11:00.
Përmbajtja e konferencës do të zhvillohet në tre panele:
-
Paneli i parë (11:30-12:30) – “Zgjerimi i BE-së në Ballkanin Perëndimor”:
Fjalimet do t’i mbajnë Zëvendësministrja për Evropën dhe Punët e Jashtme, Megi Fino, deputeti i Parlamentit Evropian Adnan Dibrani, ambasadori Gonzato, bashkëpunëtori i lartë kërkimor në CEPS Steven Blockmans, dhe drejtori rajonal i Fondacionit Andi Dobrushi. -
Paneli i dytë (14:00-15:00) – “Shqiptarët në rajon – identitet i përbashkët evropian”:
Do të marrin pjesë ministrja e Arsimit Ogerta Manastirliu, ministri për Çështjet e Jashtme të RMV Orhan Murtezani, zëvendësministrja për Evropën dhe Punët e Jashtme Silda Anagnosti Çepe, zëvendësministri për Diasporën në Kosovë Kreshnik Ahmeti, deputeti shqiptar në Serbi Shaip Kamberi, dhe kryetari i Këshillit Kombëtar të Shqiptarëve në Mal të Zi, Faik Nika. -
Paneli i tretë (15:15-16:45) – “Rruga e Shqipërisë drejt BE-së” (dyer të mbyllura):
Pjesëmarrës do të jenë ministrja e Shtetit dhe kryenegociatorja Majlinda Dhuia, ministrja e Shtetit për Administratën Adea Pirdeni, drejtori i Departamentit të Politikës e Integrimit në kryeministri Adrian Kamenica, dhe drejtoresha e BE-së në MPEJ Elida Petoshati.
Në mbrëmje, nga ora 19:00 deri 21:00, presidenti Bajram Begaj do të presë pjesëmarrësit, ku do të mbajë një fjalim dhe do të realizohet një foto familjare.
Konferenca pritet të diskutojë strategjitë e Shqipërisë për integrimin në Bashkimin Evropian dhe promovimin e identitetit të përbashkët evropian në rajon.
