Komisioni Qendror i Zgjedhjeve do të mbajë sot mbledhjen e radhës, e cila nis në ora 10:00, ku në rend dite është shpallja e rezultateve përfundimtare të zgjedhjeve të parakohshme parlamentare të 28 dhjetorit 2025.
Lajmi u konfirmua një ditë më parë nga zëdhënësi i KQZ-së, Valmir Elezi, i cili bëri të ditur se është përmbyllur i gjithë procesi paraprak zgjedhor.
KQZ njoftoi mbrëmë se në Qendrën e Numërimit dhe Rezultateve ka përfunduar rinumërimi i fletëvotimeve në të gjitha 2,557 vendvotimet, ku më 28 dhjetor 2025 u zhvillua procesi i votimit.
Fillimisht, me vendim të 13 janarit 2026, KQZ kishte caktuar rinumërim të plotë (100%) në 10 komuna, ndërsa në 28 komunat tjera ishte paraparë rinumërimi i 10% të vendvotimeve. Më pas, me vendimin e dytë të 19 janarit 2026, procesi i rinumërimit u zgjerua edhe në vendvotime shtesë në këto komuna.
Sipas KQZ-së, vendimet për rinumërim janë marrë me qëllim garantimin e saktësisë së rezultateve zgjedhore dhe reflektimin e drejtë të vullnetit të qytetarëve të Republikës së Kosovës, ashtu siç është shprehur në fletëvotime.
Me shpalljen e rezultateve përfundimtare, pritet të hapet rruga për certifikimin e zgjedhjeve dhe nisjen e afateve kushtetuese për formimin e institucioneve të reja.
