paceX ka prezantuar një ridizajnim të rëndësishëm të raketës gjigante Super Heavy, e destinuar për misione drejt Marsit, duke synuar përmirësimin e stabilitetit, manovrueshmërisë dhe procesit të rikuperimit pas uljes.
Ndryshimi kryesor është heqja e një prej pendëve të uljes, duke kaluar nga katër në tre pendë rrjete, të ridizajnuara që janë 50% më të mëdha dhe me forcë të shtuar. Ky konfigurim i ri, sipas kompanisë, i mundëson raketës të ulet në kënde më të pjerrëta dhe me kontroll më të madh.
Pjesët e ridizajnuara, që thuhet se janë ndër sipërfaqet më të mëdha të kontrollit aerodinamik të ndërtuara ndonjëherë për një raketë, janë prezantuar përmes një postimi në rrjetin X, ku SpaceX publikoi imazhe të detajuara të dizajnit të ri.
Përmirësim i zbritjes dhe kapjes
Pendët e reja jo vetëm që përmirësojnë kontrollin gjatë rihyrjes, por janë vendosur më poshtë në trupin e shtytësit për t’u përshtatur me krahët e kapjes së kullës së lëshimit, duke eliminuar nevojën për platforma uljeje. Ky pozicion i ri gjithashtu mbron pendët nga nxehtësia intensive e motorëve.
Një risi tjetër është integrimi i boshtit dhe mekanizmave të brendshëm të pendëve brenda rezervuarit kryesor të karburantit, për mbrojtje më të madhe gjatë fluturimit.
Mësime nga dështimet e fundit
Ridizajnimi vjen pas një serie dështimesh në fluturimet testuese. Në maj, një fluturim provë përfundoi me rrëzimin e shtytësit në Gjirin e Meksikës, ndërsa faza e sipërme shpërtheu mbi Oqeanin Indian. Po ashtu, në qershor, faza e sipërme shpërtheu gjatë testimeve në tokë.
Testi i ardhshëm
SpaceX planifikon ta testojë konfigurimin e ri në fluturimin e 10-të orbital, i cili mund të zhvillohet më 16 gusht, me një dritare lëshimi nga ora 06:30 deri në 20:30, sipas orës lokale në Teksas. Kompania zakonisht nuk i konfirmon datat përfundimtare deri afër momentit të nisjes.
Elon Musk ka vendosur një objektiv ambicioz – dërgimin e raketës Super Heavy me robotin humanoid të Teslës, Optimus, në Mars deri në fund të vitit 2026. Megjithatë, dështimet e fundit dhe shkurtime të buxhetit të NASA-s mund ta shtyjnë afatin.
