Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim në Gjykatën e Posaçme dosjen penale ndaj presidentit të Partisë së Lirisë, Ilir Meta, ish-bashkëshortes së tij Monika Kryemadhi dhe tre të tjerëve të përfshirë në këtë çështje: Pirro Xhixho, Fatime Kryemadhi dhe Ema Çoku.
Akurat ndaj të pandehurve
Sipas SPAK, hetimet e nisura në vitin 2019 dhe të bashkuara në një dosje të vetme në vitin 2024, kanë zbuluar një sërë skemash korruptive, pastrim të produkteve të veprës penale dhe fshehje të pasurive.
-
Ilir Meta akuzohet për “korrupsion pasiv të funksionarëve të lartë shtetërorë ose të zgjedhurve vendorë” në tre raste, dy prej të cilave në bashkëpunim, “pastrim të produkteve të veprës penale” në bashkëpunim dhe “mosdeklarim apo fshehje të pasurive”.
-
Monika Kryemadhi akuzohet për “korrupsion pasiv” në dy raste të kryera në bashkëpunim, “pastrim parash” dhe “fshehje pasurie”.
-
Pirro Xhixho akuzohet për “korrupsion pasiv” në bashkëpunim.
-
Ema Çoku dhe Fatime Kryemadhi akuzohen për “pastrim të produkteve të veprës penale” në bashkëpunim.
Hetimi dhe provat
SPAK thotë se hetimet kanë dokumentuar përdorimin e pushtetit politik për të favorizuar biznese të caktuara në këmbim të shpërblimeve, pastrim të të ardhurave kriminale, si dhe mosdeklarim të shpenzimeve të konsiderueshme në deklaratat e pasurisë.
Hetimet janë zhvilluar në bashkëpunim me autoritetet e SHBA-së, Austrisë, Italisë, San Marinos dhe Qipros.
Procesi gjyqësor
Dosja i është dërguar për gjykim Gjykatës së Posaçme të Shkallës së Parë, e cila do të vendosë mbi fajësinë ose pafajësinë e të pandehurve.
SPAK thekson se “çdo person prezumohet i pafajshëm derisa fajësia e tij të vërtetohet me vendim gjyqësor të formës së prerë”.
