SPAK goditi sërish rrjetin kriminal të lidhur me Ervis Martinajn, duke arrestuar në orët e para të mëngjesit dy nga njerëzit e tij më të afërt: Elvin Merlika (47 vjeç) dhe Alket/Fred Xhixha (42 vjeç). Të dy konsiderohen “ushtarë të rrezikshëm” të bos-it të zhdukur të lojërave të fatit.
Operacioni u zhvillua në dy vila në Fushë-Kuqe, zona që njihet prej vitesh si bazë e Martinajt. Pamjet me dron treguan mënyrën se si Forcat Operacionale rrethuan objektet pranë lumit Droja, ku u gjet edhe një varkë që dyshohet se përdorej për lëvizje drejt Lagunës së Patokut.
Çfarë u sekuestrua brenda vilave
Policia gjeti:
-
2 armë zjarri pistoleta
-
2 armë gjahu
-
Radio komunikimi si ato të policisë
-
Jelek antiplumb
-
Sasi municioni luftarak
Të dy të arrestuarit figurojnë në dosjen e “Plumbit të Artë”, ku dëshmitari i drejtësisë, Nuredin Dumani, i përmend si pjesë të planit të Martinajt për eliminimin e Indrit Dokles, ish-kreut të bandës së Durrësit. Sipas Dumanit, Martinaj kishte ofruar 500 mijë euro për vrasjen e Dokles dhe kishte paguar paraprakisht 100 mijë euro, të dërguara në Kosovë nga Merlika dhe Xhixha.
SPAK i akuzon të dy për:
-
Sigurim kushtesh dhe mjetesh për vrasje në kuadër të grupit kriminal
-
Pjesëmarrje në grup të strukturuar kriminal
-
Kryerje veprash penale në kuadër të organizatës kriminale
Po ashtu, SPAK ka kërkuar konfiskimin e 23 pasurive të Merlikës, përfshirë apartamente, troje, toka dhe kuota biznesi.
Operacion paralel në Shkodër
Në të njëjtën kohë, njësitë speciale RENEA zhvilluan një tjetër aksion në Dobraç, territor i njohur si bazë e grupit të Bajrave, duke bastisur disa objekte të lidhura me këtë fis të fuqishëm kriminal.
Operacionet konsiderohen një prej goditjeve më të koordinuara të muajve të fundit kundër dy prej rrjeteve më të njohura kriminale në vend.
