Dhomat e Specializuara të Kosovës kanë njoftuar se kanë rrëzuar apelin e Pjetër Shalës kundër urdhrit për zhdëmtim, duke lënë në fuqi vendimin e mëparshëm të Trupit Gjykues për kompensimin e viktimave.
Sipas njoftimit zyrtar, Paneli i Gjykatës së Apelit, i përbërë nga gjyqtarët Mishelë Pikar, Kai Ambos dhe Nina Jorgensen, ka konstatuar se nuk ka pasur gabime ligjore apo në vlerësimin e provave, prandaj ka refuzuar të gjitha pikat e apelit.
Në procesin e zhdëmtimit morën pjesë tetë viktima, të cilat kërkuan kompensim për dëmet e pësuara. Me vendimin e datës 29 nëntor 2024, Trupi Gjykues kishte urdhëruar Shalën të paguajë 208 mijë euro, si kompensim për dëmin fizik, mendor dhe material të shkaktuar.
Apeli i Shalës përmbante pesë pika, ku ai pretendonte gabime në:
-
interpretimin e ligjit për shkakësinë,
-
vlerësimin e provave për dëmin material,
-
përcaktimin e përgjegjësisë dhe shumës së zhdëmtimit, duke e cilësuar atë disproporcionale,
-
si dhe kërkonte pezullimin e procesit të zhdëmtimit deri në përfundimin e apelit kundër aktgjykimit të fajësisë.
Megjithatë, Paneli i Apelit i rrëzoi të gjitha pretendimet, duke theksuar se kërkesa për pezullim ishte bërë e pavlefshme, pasi aktgjykimi i apelit për fajësinë ishte lëshuar më 14 korrik 2025. Gjykata vlerësoi se procesi i zhdëmtimit nuk e ka cenuar të drejtën e Shalës për një procedurë të drejtë dhe të shpejtë.
Me këtë vendim, urdhri për zhdëmtim mbetet në fuqi, ndërsa procesi për kompensimin e viktimave vazhdon sipas vendimit të Trupit Gjykues.
