Pas disa ditësh me luhatje atmosferike, e premtja sjell stabilizim të plotë të motit në territorin e Kosovës. Sipas parashikimeve meteorologjike, gjatë gjithë ditës do të mbizotërojë mot me diell, me prezencë të pakët të reve lokale, pa ndonjë ndikim të theksuar në kushtet e përgjithshme atmosferike.
Temperaturat pritet të shënojnë rritje të ndjeshme, ku maksimalet do të tejkalojnë pragun prej 30 gradë Celsius, duke rikthyer ndjesinë e verës së nxehtë në shumicën e rajonit.
Edhe në Shqipëri, Maqedoninë e Veriut, Luginën e Preshevës dhe Malin e Zi pritet mot kryesisht me diell dhe temperatura në rritje. Megjithatë, vranësira të lehta pritet të paraqiten në zonat malore në jug të Kosovës, në perëndim të Maqedonisë së Veriut, si dhe në lindje e juglindje të Shqipërisë. Në këto zona ekziston mundësia për reshje shumë të dobëta, por pa ndikim të theksuar në aktivitetet ditore.
Autoritetet meteorologjike u bëjnë thirrje qytetarëve që të marrin masa mbrojtëse ndaj temperaturave të larta, sidomos gjatë orëve të mesditës.
