Në një zhvillim të rëndësishëm diplomatik, Turqia ka mirëpritur sot në Stamboll delegacionet nga Rusia dhe Ukraina, në bisedimet e para të drejtpërdrejta mes palëve ndërluftuese që nga marsi i vitit 2022. Ministri i Jashtëm i Turqisë, Hakan Fidan, u uroi “fat të mirë” pjesëmarrësve në nisje të këtij procesi të ri negociator, duke theksuar rëndësinë e momentit për paqen në rajon.
“Ky takim e shënon kontaktin e parë të drejtpërdrejtë që nga marsi i vitit 2022. Ne duhet ta shfrytëzojmë këtë mundësi për të bërë progres në rrugën drejt paqes,” deklaroi Fidan në fjalimin hapës, sipas raportimeve të televizionit CNN.
Duke e vënë theksin te nevoja urgjente për ndaljen e luftimeve, ministri turk shtoi: “Përderisa lufta po vazhdon të marrë jetë, zbatimi i menjëhershëm i një armëpushimi është bërë gjithnjë më jetik. Fazës së ardhshme do t’i jepet formë përmes zgjedhjeve që ne i bëjmë dhe hapave që i ndërmarrim.”
Fidan i cilësoi negociatat e ditës së premte si “bisedime teknike”, të cilat synojnë të ndërtojnë bazat për një takim të mundshëm në të ardhmen mes liderëve të dy vendeve. Megjithëse presidenti rus Vladimir Putin kishte qenë iniciatori i këtij propozimi për dialog, Kremlini ka bërë të ditur se ai nuk do të marrë pjesë personalisht në këtë raund bisedimesh.
Në tryezën e bisedimeve mungon gjithashtu presidenti ukrainas Volodymyr Zelensky, i cili ndodhet aktualisht në Shqipëri. Zelensky më parë ka deklaruar se i vetmi zyrtar rus me të cilin do të ishte i gatshëm të takohej është vetë presidenti Putin.
Bisedimet në Stamboll konsiderohen si një mundësi e rrallë për të rivendosur dialogun diplomatik mes dy vendeve që prej nisjes së luftës, ndërkohë që roli ndërmjetësues i Turqisë thekson përpjekjet e saj për të ndikuar në stabilitetin dhe paqen rajonale.
