Frika nga përparimi i shpejtë i inteligjencës artificiale të përgjithshme (IAG) po i shtyn disa studentë të universiteteve më prestigjioze në botë të braktisin studimet e tyre, duke zgjedhur të angazhohen drejtpërdrejt në kërkime, siguri dhe startup-e të lidhura me këtë fushë.
Një prej tyre është Alice Blair, e regjistruar në Institutin e Teknologjisë në Masaçusets (MIT) në vitin 2023, e cila ka marrë leje të përhershme nga kolegji. “Isha e shqetësuar se mund të mos isha gjallë për t’u diplomuar për shkak të IAG-së,” tha Blair për Forbes. Ajo tashmë punon si shkrimtare teknike në Qendrën jofitimprurëse për Sigurinë në Inteligjencën Artificiale dhe nuk planifikon të rikthehet në kampus.
Një fenomen në rritje në universitete elitare
Rasti i Blair nuk është i izoluar. Adam Kaufman, ish-student i Harvardit, u largua nga studimet për t’iu bashkuar Redwood Research, një organizatë që analizon sistemet e IA-së që mund të veprojnë kundër interesave njerëzore. Shoku i tij i dhomës, vëllai dhe e dashura kanë ndjekur të njëjtin hap, duke braktisur Harvardin për të punuar në OpenAI.
Një anketë e zhvilluar me 326 studentë të Harvardit tregoi se gjysma e tyre shprehnin shqetësime serioze për ndikimin e IA-së në karrierat e tyre. Ndërsa disa frikësohen nga skenarë katastrofikë të superinteligjencës, të tjerë shqetësohen më tepër për humbjen e vendeve të punës.
Afate të shkurtra për ardhjen e AGI-së
Ekspertë dhe drejtues të industrisë japin parashikime agresive. Sam Altman i OpenAI ka thënë se AGI mund të shfaqet para vitit 2029, ndërsa Demis Hassabis i Google DeepMind sugjeron një dritare prej pesë deri në dhjetë vjet. Sipas diplomatit të Harvardit, Nikola Jurković, automatizimi i plotë i ekonomisë mund të ndodhë brenda gjashtë viteve të ardhshme.
Shqetësime mes ekspertëve dhe skepticizëm akademik
Një raport i vitit 2024 i porositur nga Departamenti i Shtetit të SHBA paralajmëroi për rreziqe në “nivel zhdukjeje”, por disa ekspertë kërkojnë kujdes ndaj alarmizmit. Profesori i Universitetit të Nju Jorkut, Gary Marcus, u shpreh se zhdukja e njerëzimit është “shumë e pamundur”, duke e cilësuar retorikën për AGI të afërt si “ekstremizëm marketingu”.
Startup-e, mundësi dhe paralajmërime
Tregu i startup-eve po tërheq shumë prej studentëve. Shembuj si Anysphere, Mercor dhe dashCrystal janë themeluar nga ish-studentë që lanë universitetet për të ndjekur botën e sipërmarrjes. Megjithatë, largimi nga kolegji mbart rreziqe ekonomike. Sipas të dhënave të Qendrës Kërkimore Pew, të rinjtë me diplomë bachelor fitojnë mesatarisht 20 mijë dollarë më shumë në vit sesa bashkëmoshatarët pa diplomë.
Edhe themeluesi i Y Combinator, Paul Graham, së fundi këshilloi: “Mos e lini kolegjin për të filluar ose për të punuar për një startup.” Edhe vetë Blair ofron një paralajmërim për bashkëmoshatarët: “Është shumë e vështirë dhe e lodhshme të lësh kolegjin herët dhe të gjesh një punë. Do ta rekomandoja vetëm për individë jashtëzakonisht rezistentë.”
