Një sulm ajror rus ndaj Kolonisë Penale Bilenkivska Nr. 99, në rajonin juglindor të Zaporizhzhisë, ka rezultuar në vdekjen e 16 të burgosurve dhe plagosjen e rreth 100 të tjerëve, kanë bërë të ditur autoritetet ukrainase dhe Misioni i Monitorimit të të Drejtave të Njeriut të OKB-së në Ukrainë (HRMMU). Ngjarja ndodhi më 28 korrik, rreth 25 kilometra nga vija e frontit, ku forcat ruse thuhet se hodhën bomba të fuqishme rrëshqitëse mbi kompleksin e burgut.
Sipas HRMMU-së, të gjithë viktimat ishin të burgosur civilë. Misioni ndërkombëtar ka njoftuar se do të vizitojë vendin e ngjarjes për të mbledhur të dhëna të mëtejshme. Nga ana e saj, Rusia ka mohuar çdo përgjegjësi për këtë sulm.
OKB: Sulmi është shkelje e rëndë e ligjit ndërkombëtar
Kreu i misionit të OKB-së, Danielle Bell, deklaroi se “të burgosurit janë civilë dhe duhet të mbrohen në përputhje me të drejtën ndërkombëtare humanitare”, duke theksuar se objektet civile, si burgjet, nuk mund të jenë objektiva ushtarake përveçse në rastet kur përdoren për qëllime luftarake.
Viktima edhe në Kharkiv dhe Dnipropetrovsk
Të martën, një tjetër sulm në rajonin e Kharkivit shkaktoi vdekjen e pesë civilëve dhe plagosjen e tre të tjerëve. Ndërkohë, të hënën, forcat ruse goditën pranë një spitali në Kamianske, në rajonin e Dnipropetrovsk, duke vrarë tre persona dhe plagosur 22. Sulmi preku edhe repartin e maternitetit të spitalit. Sipas burimeve zyrtare, ndër viktimat ishin dy pacientë, përfshirë një grua shtatë muajshe shtatzënë.
Zhvillimet e fundit kanë rritur shqetësimet ndërkombëtare për përshkallëzimin e sulmeve ndaj infrastrukturës civile në Ukrainë dhe nevojën urgjente për garantimin e mbrojtjes së popullsisë së pambrojtur sipas normave të së drejtës ndërkombëtare.
