Një sulm i dhunshëm me pasojë grabitje ka ndodhur në orët e para të mëngjesit të së shtunës në fshatin Përlëpnicë të Gjilanit.
Sipas raportit të Policisë së Kosovës, rreth orës 03:04, dy persona të dyshuar që lëviznin me një veturë kanë sulmuar fizikisht një mashkull kosovar, duke i shkaktuar lëndime të rënda trupore. Pas sulmit, autorët i kanë marrë viktimës një shumë parash dhe janë larguar në drejtim të panjohur.
Viktima është dërguar me urgjencë në Qendrën Klinike Universitare të Kosovës (QKUK) në Prishtinë për trajtim mjekësor, ndërsa policia ka nisur hetimet për identifikimin dhe arrestimin e personave të përfshirë në këtë ngjarje.
Burimet policore bëjnë të ditur se rasti po trajtohet si “lëndim i rëndë trupor” dhe “grabitje”.
