Një nga sulmet më vdekjeprurëse që nga fillimi i luftës ka goditur kryeqytetin ukrainas, Kievin, ku Rusia ka ndërmarrë një sulm ajror të gjerë gjatë natës. Sipas të dhënave të fundit, të raportuara nga agjencitë ndërkombëtare si Reuters dhe The Guardian, nëntë persona kanë humbur jetën dhe më shumë se 70 të tjerë janë plagosur, përfshirë edhe gjashtë fëmijë.
Sulmi përfshinte një kombinim të raketave dhe dronëve, të cilët kanë shkaktuar zjarre masive në disa pjesë të qytetit. Sipas autoriteteve të Kievit, dëmet janë të konsiderueshme, me pesë rrethe të prekura, përfshirë lagjen perëndimore Svyatoshinsky, ku një bllok apartamentesh është shkatërruar plotësisht.
Zjarret kanë përfshirë garazhe, ndërtesa administrative dhe banesa, ndërsa ekipet e zjarrfikësve kanë qenë në terren për të vënë situatën nën kontroll. Ekipet e shpëtimit janë ende duke kërkuar për persona të mbetur nën rrënoja.
Ky është një nga sulmet më të rënda që ka përjetuar kryeqyteti ukrainas në tre vitet e fundit, që nga fillimi i pushtimit rus në shkurt të vitit 2022. Edhe më herët, në fillim të prillit, Kiev u godit nga një tjetër sulm me raketa, në të cilin u plagosën të paktën tre persona.
Ndërkohë, edhe qyteti i Kharkivit në lindje të Ukrainës ka qenë në shënjestër të raketave ruse. Sipas kryetarit të qytetit, Igor Terekhov, shtatë raketa kanë goditur zonën, duke plagosur dy persona dhe duke shkaktuar dëme të mëdha materiale. Autoritetet lokale kanë bërë thirrje për vigjilencë dhe kujdes të shtuar.
Rusia ka vijuar sulmet në disa qytete ukrainase, ndërsa përleshjet e përgjakshme dhe kërcënimi ndaj civilëve mbeten të vazhdueshëm.
