Astronautët e NASA-s, Sunita Williams dhe Barry Wilmore, kanë shprehur gatishmërinë e tyre për të udhëtuar përsëri në hapësirë me anijen kozmike Starliner, pasi kaluan 286 ditë në Stacionin Ndërkombëtar të Hapësirës (ISS).
Në një konferencë për shtyp pas kthimit të tyre në Tokë, Williams, astronautja slloveno-indiane, shprehu kënaqësinë për eksperiencën e saj në hapësirë: “Unë në fakt isha e lumtur sepse më pëlqen të jetoj në hapësirë,” tha ajo. Ajo dhe kolegu i saj Wilmore fluturuan në ISS në qershor të kaluar me anijen kozmike Boeing Starliner, e cila fillimisht ishte planifikuar të qëndronte për tetë ditë. Megjithatë, për shkak të disa problemeve teknike, udhëtimi u zgjat dhe ata qëndruan në hapësirë për 286 ditë, duke u kthyer më 18 mars.
“Starliner është një anije kozmike e shkëlqyer dhe ka aftësi të mëdha, ka vetëm disa gjëra që duhet të zgjidhen,” shtoi Williams. Edhe Wilmore e mbështeti këtë, duke shprehur se janë të gatshëm të fluturojnë përsëri në hapësirë me të.
Në këtë qëndrim të gjatë në hapësirë, ata morën pjesë në eksperimente shkencore dhe kontribuuan për mirëmbajtjen e Stacionit Ndërkombëtar të Hapësirës. Williams, e cila bëri histori si personi i parë që vrapoi një maratonë në hapësirë, falënderoi të gjithë ata që ndihmuan për kthimin e saj në Tokë dhe shprehu mirënjohjen për mbështetjen që mori nga publiku global.
Ata dy astronautët theksuan se qëndrimi i tyre në hapësirë është një mundësi e shkëlqyer për eksplorimin e hapësirës dhe se janë krenarë që mundën të kontribuojnë në këtë fushë.
Pavarësisht se qëndrimi i tyre ishte i gjatë, ata nuk arritën të thyenin rekordet për qëndrimin më të gjatë të vazhdueshëm në hapësirë. Ky rekord mbahet ende nga astronauti amerikan Frank Rubio, i cili qëndroi për 371 ditë në hapësirë, pas një mosfunksionimi në anijen ruse Soyuz.
