Ministri i Punëve të Brendshme, Xhelal Sveçla, ka reaguar pas bastisjes së zhvilluar këtë të diel në fshatin Vallaq të Zveçanit, ku u sekuestrua një sasi e madhe armësh. Sipas tij, operacioni u zhvillua nga Policia e Kosovës në bashkëpunim me AKI-në dhe Prokurorinë, nën monitorimin e KFOR-it dhe EULEX-it.
Gjatë bastisjes janë gjetur raketahedhës dore (të njohura si zolla), granata dore, armë të ndryshme dhe municion – një arsenal që ministri e cilëson “të mjaftueshëm për një njësi terroriste”. Sveçla deklaroi se armët ishin të fshehura në një objekt që, sipas informacioneve të para, i përket politikanit serb Aleksandar Arsenijevic.
“Krimi nuk mund të fshihet pas petkut politik. Institucionet tona do të vazhdojnë pa ndalur deri në çrrënjosjen e plotë të mbetjeve kriminale e terroriste të Serbisë në Kosovë,” theksoi Sveçla.
Hetimet për rastin po vazhdojnë, ndërsa autoritetet nuk kanë bërë ende të ditur nëse ka persona të arrestuar.
