Ministri i Punëve të Brendshme, Xhelal Sveçla, ka përgëzuar Inspektoratin Policor të Kosovës për aksionin e ndërmarrë ditën e djeshme, që rezultoi me arrestimin e katër qytetarëve, përfshirë një zyrtar të lartë të Policisë së Kosovës.
Në një deklaratë publike, Sveçla theksoi se “krimi nuk ka vend në shoqërinë tonë, e posaçërisht në radhët e Policisë”, duke nënvizuar rëndësinë e pastrimit të këtij institucioni nga elementët që, sipas tij, “njollosin emrin e institucionit më kredibil dhe me besueshmërinë më të madhe në vend”.
Ai i bëri thirrje IPK-së për të vazhduar me vendosmëri aksionet ndaj veprimtarive të paligjshme brenda strukturave të sigurisë, duke ritheksuar se Policia e Kosovës duhet të jetë një adresë për luftimin e krimit, dhe jo strehë apo mburojë për veprimtari kriminale.
Ministri ka ritheksuar mbështetjen e tij të pakushtëzuar për veprimet e Inspektoratit, duke i cilësuar ato si jetike për ruajtjen e integritetit të Policisë së Kosovës.
