Pas zhurmës së krijuar nga koalicioni VV–Xhafer Tahiri në Vushtrri, ku LDK-ja nxitoi të sqarojë se marrëveshja nuk pati leje nga qendra e partisë, gazetari Valon Syla kritikoi ashpër drejtimin e LDK-së së Lumir Abdixhikut.
Syla tha se po vërehet një flirt i pazakontë mes VV-së dhe LDK-së, ndërsa qendra e partisë po reagon në mënyrë të dobët dhe të letargjike, sikur “të luanin PlayStation”.
“Ky rugovizmi po na del diçka marakli i marksistave. Ndërsa Fryma Abdixhikiane, pafuqishëm reagon kundër nga qendra mas një loje PlayStation”, shkroi Syla në Facebook.
Ai nuk u ndal aty, por ngacmoi edhe më tej LDK-në, duke sugjeruar se ndoshta do të ishte më mirë që partia të bashkohej plotësisht me Vetëvendosjen:
“A po dilni kadale në VV krejt, se na keni lodhë. Tash analistat e shumtë të LDK-së dalin me një teori që PDK i ka fajet pse LDK doli andej”, tha Syla.
Kujtojmë se marrëveshja e sotme mes Tahirit dhe VV-së u nënshkrua publikisht në prani të kryeministrit Albin Kurti, ndërsa qendra e LDK-së e ka konsideruar veprimin si të pakoordinuar dhe pa autorizim.
