Ushtruesja e detyrës së Presidentes, Albulena Haxhiu, do ta presë sot në takim Kryetarin e Komisionit Qendror të Zgjedhjeve, Kreshnik Radoniqin.
Ky takim vjen pas shpërndarjes së Kuvendit, meqë Kuvendi dështoi ta zgjedhë Presidentin e ri.
Takimi do të mabhet në orën 14:00, në kabinetin e Presidencës.
“Në orën 14:00, Ushtruesja e Detyrës së Presidentes së Republikës së Kosovës, Albulena Haxhiu, pret në takim Kryetarin e Komisionit Qendror të Zgjedhjeve (KQZ), Kreshnik Radoniqi”, thuhet në njoftim.
Afati kushtetues 34 ditor për zgjedhjen e Presidentit ka përfunduar mbrëmë në orën 24:00. Gjykata Kushtetuese me aktgjykim ka përcaktuar që Kuvendi shpërndahet me automatizëm nëse brenda këtij afati nuk zgjidhet presidenti.
Haxhiu deklaroi se zgjedhjet do të shpallen brenda afatit kushtetues.
“Sipas aktgjykimit, Kuvendi konsiderohet i shpërndarë. Zgjedhjet do të shpallen brenda afatit kushtetues”, tha Haxhiu, në fund të seancës, fiks në orën 00:00.
Haxhiut tani i mbetet t’i ftoj partitë në takim për ta caktuar datën e zgjedhjeve brenda 45 ditësh.
E diela e 7 qershorit është data e fundit që mund të caktohet si ditë për mbajtjen e zgjedhjeve.
