Opozita e Gjelbër në Gjermani ka hedhur akuza të ashpra ndaj qeverisë së kancelarit Friedrich Merz, duke e akuzuar koalicionin për refuzimin e një pakete ndihme shtesë prej 4.5 miliardë eurosh për Ukrainën, me fokus në mbrojtjen ajrore.
Përplasja ndodhi gjatë seancës maratonë të buxhetit në Bundestag, ku komiteti përkatës finalizoi planin e shpenzimeve për vitin 2025. Amendamenti i të Gjelbërve do ta rriste buxhetin e Gjermanisë për Ukrainën nga 8.26 miliardë në 12.76 miliardë euro, duke përfshirë financimin e sistemeve të reja të mbrojtjes ajrore.
Ligjvënësi i të Gjelbërve, Sebastian Schäfer, e justifikoi kërkesën me sulmet e vazhdueshme ruse ndaj qyteteve ukrainase. “Me buxhetin e vitit 2025 ne mund të ofrojmë mbrojtje ajrore shtesë. Fatkeqësisht, CDU dhe SPD e refuzuan këtë, pavarësisht premtimeve të tyre në Kiev”, tha ai.
Megjithatë, deputetët e koalicionit Merz e cilësuan propozimin si “një marifet politik të opozitës”, duke theksuar se shumat e kërkuara nuk mund të shpenzoheshin brenda vitit për shkak të afateve të gjata të dorëzimit të armëve dhe kufizimeve fiskale. “Tingëllon bukur, por nuk ka lidhje me realitetin”, u shpreh deputeti socialdemokrat Andreas Schwarz.
Ndërkohë, analistët theksojnë se Evropa tashmë ka tejkaluar SHBA-të si mbështetësja kryesore e Ukrainës. Vetëm Gjermania ka ndarë deri më tani 16.7 miliardë euro ndihmë ushtarake, duke u renditur e dyta pas Shteteve të Bashkuara.
Buxheti i miratuar më 4 shtator përfshin tashmë 4.2 miliardë euro ndihmë ushtarake shtesë për vitin 2025, si dhe fonde për kujdesin mjekësor të ushtarëve ukrainas dhe rindërtim humanitar.
