Të paktën 75 palestinezë, mes tyre 18 kërkues ndihmash, janë vrarë dhe 268 të tjerë janë plagosur nga sulmet ajrore izraelite në Gaza gjatë 24 orëve të fundit, njoftoi Ministria e Shëndetësisë e drejtuar nga Hamasi.
Forcat tokësore izraelite vijojnë operacionet në periferi të qytetit të Gazës, në kuadër të përgatitjeve për ofensivën e planifikuar drejt pjesës veriore të qytetit, raportoi IDF në një deklaratë të publikuar nga Times of Israel.
Ndërkohë, sipas Zyrës së Komisionerit të Lartë të OKB-së për të Drejtat e Njeriut, vetëm që nga tetori i vitit 2023 në Bregun Perëndimor janë vrarë 982 palestinezë nga forcat dhe kolonët izraelitë, ndërsa mbi 42 mijë persona janë zhvendosur me forcë për shkak të operacioneve ushtarake, prishjes së shtëpive dhe sulmeve të kolonëve. Komisioneri i Lartë, Volker Turk, e quajti dhunën e fundit në fshatin Al Mughayyir “një tjetër shembull i shtypjes së vazhdueshme ndaj palestinezëve”, duke kërkuar ndalimin e dhunës dhe llogaridhënie të paanshme.
Nga ana tjetër, një zëdhënës i ushtrisë izraelite, Avichay Adraee, deklaroi se “evakuimi i qytetit të Gazës është i pashmangshëm”, duke theksuar se çdo familje që lëviz drejt jugut do të marrë “ndihmën më bujare humanitare”. Ai shtoi se IDF ka nisur përgatitjet për ngritjen e tendave dhe krijimin e qendrave të shpërndarjes së ndihmave në pjesën jugore të Rripit të Gazës.
