Ushtria izraelite ka qëlluar sërish mbi civilë palestinezë që prisnin ndihma humanitare, duke shkaktuar një tjetër tragjedi në Rripin e Gazës. Sipas Mbrojtjes Civile lokale, të paktën 93 persona janë vrarë dhe dhjetëra të tjerë janë plagosur të dielën, në disa pika të shpërndarjes së ndihmave në Gaza.
Tragjedia ndodhi në tri lokacione: 80 viktima u regjistruan në Gazën veriore, nëntë në afërsi të një qendre ndihmash në Rafah, dhe katër të tjerë pranë një pike shpërndarjeje në Khan Yunis, në jug të territorit. Programi Botëror i Ushqimit (WFP) i Kombeve të Bashkuara raportoi se një konvoj kamionësh të organizatës së tyre “u përball me një turmë civilësh të uritur që ishin nën zjarr” menjëherë pasi kaluan kufirin, shkruan BBC.
Nga ana tjetër, Forcat e Mbrojtjes së Izraelit (IDF) kanë pohuar se kanë përdorur “të shtëna paralajmëruese” për të shmangur një “kërcënim të afërt”, ndërkohë që kanë vënë në dyshim numrin e viktimave të raportuara nga pala palestineze.
Uria po përhapet: qindra në rrezik vdekjeje
Ministria e Shëndetësisë në Gaza paralajmëroi se kriza humanitare është në përshkallëzim. Sipas saj, njerëzit po mbërrijnë në spitalet e territorit “në gjendje të rraskapitur dhe të shteruar plotësisht”, ndërsa të dielën raportoi 18 vdekje nga uria vetëm brenda një dite. “Trupat e tyre janë plotësisht të vyshkur”, thuhet në deklaratë.
Në Spitalin Shifa të Qytetit të Gazës, drejtori Hassan Al Shaer deklaroi për BBC Arabic se objekti është “plotësisht i mbingarkuar”. Jashtë spitalit, një grua dëshmoi: “Fëmijët po vdesin nga uria. Po mbijetojmë vetëm me ujë dhe kripë.”
Një banor lokal, në intervistë për AFP, tha se u përpoq të merrte një qese miell, por hasi në turma të dëshpëruara dhe “luftime vdekjeprurëse”. “Tanket na bombardonin rastësisht, dhe snajperët izraelitë qëllonin si të ishim kafshë në pyll”, tha ai.
OKB dhe agjencitë ndërkombëtare alarmojnë për krizë ekstreme humanitare
WFP e cilësoi dhunën ndaj civilëve që kërkojnë ndihmë si “krejtësisht të papranueshme”, ndërsa ka theksuar nevojën urgjente për ndihma bazë. Ndërkohë, Izraeli ka mohuar akuzat, duke deklaruar se “veprimet ushtarake kishin për qëllim eliminimin e kërcënimeve të afërta”.
Qytetarët e Gazës janë të detyruar të mbështeten thuajse vetëm në Fondacionin Humanitar Amerikano-Izraelit për ushqim (GHF). Megjithatë, OKB njofton se mbi 800 civilë janë vrarë pranë qendrave të ndihmës ose përgjatë rrugëve të konvojeve humanitare që nga fundi i majit.
Kequshqyerja është duke u përhapur me shpejtësi, sidomos mes grave dhe fëmijëve, dhe vetëm javën e kaluar janë raportuar tre raste të foshnjave që humbën jetën nga uria. WFP bëri të ditur se çmimi i miellit për bukë është 3,000 herë më i lartë se para fillimit të luftës.
Izraeli dëbon zyrtarin e OKB-së që denoncoi krizën humanitare
Në një tjetër zhvillim, autoritetet izraelite kanë revokuar lejen e qëndrimit të Jonathan Whittall, drejtor i Zyrës për Koordinimin e Çështjeve Humanitare të OKB-së (OCHA) në Izrael. Whittall kishte dënuar publikisht situatën humanitare në Gaza. Në Tel Aviv, ai u akuzua për përhapje “gënjeshtrash” rreth luftës.
